МИА, 13.08.2010

 

Лондон, 12 август 2010 (МИА) – Аеродромите „Хитроу“ и „Станстед“ во Лондон, како и аеродромите во Саутхемптон, Глазгов, Единбург и Абердин се соочуваат со блокада поради најавениот штрајк на помошниот персонал на британската компанија БАА која управува со овие шест аеродроми во Велика Британија, јави дописникот на МИА од Лондон.

Синдикалната унија Унита закажа за денеска гласање на членството за тоа дали треба да се организира штрајк на 19 август, а исходот на гласањето што првично беше најавен за пладневните часови е поместен за попледнето. Како главна причина за штрајкот на вработените во безбедносните и пожарникарските служби, како и помошниот персонал на аеродромите е посочен неуспехот на синдикатот и управата на БАА да се спогодат околу платите и условите за работа во следната година.

Премиерот Дејвид Камерон го осуди решението за штрајкување, инсистирајки дека тоа и наштетува на британската индустрија, на бизнисот, на угледот на земјата како туристичка дестинација, а им штети и на вработените. Повеќе стотици илјади британци и други патници ќе бидат погодени од штрајкот и блокирањето на аеродромите, доколку мнозинството од работниците, членови на синдикалната унија Унита се изјаснат за штрајкување. ти/аа/16:04