Директорите на Агенцијата за цивилно воздухопловство и на Управата за финансиска полиција, Драги Стојаноски и Слободан Ивановски, потпишаа Меморандум за соработка, со кој се  утврдуваат облиците и начинот на соработката меѓу двете институции, во насока на зголемување на ефикасноста и ефективноста при размена на податоци по електронски пат, од делокругот на своето работење.

Размената на информации, како и пристапот до податоци ќе се врши на начин што, Агенцијата за цивилно воздухопловство на определена електронска адреса на Управата за финансиска полиција во електронска форма, ќе ги достави податоците содржани во Регистарот на впишани воздухоплови на Република Северна Македонија и тоа: податоци за датумот на регистрација, година на производство, регистарска ознака, тип и модел на воздухоплов, сериски број, претходна регистерска ознака, име на сопственик/ корисник  со податоци за ЕМБГ на физичко лице, ЕМБС или ЕДБ за правно лице, адреса и други податоци со кои располага институцијата.

По секоја извршена промена во Регистарот на впишани воздухоплови, Агенцијата за цивилно воздухопловство ќе ја извести Управата за финансиска полиција и ќе достави ажурирана верзија од Регистарот на впишани воздухоплови на определената електронска адреса.

Управата за финансиска полиција, добиените податоци може да ги користи исклучително во согласност со своите законски надлежности, со тоа што е должна да ги заштити од неовластено користење односно злоупотреба.

Со потпишувањето на овој документ, двете институции, се обврзаа да се придржуваат кон прописите за заштита на личните податоци, но и веднаш да ја известат другата договорна страна, при евентуално сознание за неовластен пристап до податоците што се предмет на размена.

Меморандумот стапува на сила со денот на неговото потпишување.