МИА, 25.05.2010

 

Албанскиот емигрант Лаурнат Дервишај уапсен е на тиранскиот аеродром „Мајка Тереза“ при обид да влезе во авион со пиштол „застава “ со девет куршими, јави дописникот на МИА од Тирана.

Пиштолот кој бил скриен во неговите лични работи кои ги носел во патничката торба, бил откриен кога истата минувала низ скенерска контрола. Дваесет и тригодишниот Албанец, по потекло од Орикум, кај Валона, требало да патува за Џенова. Поседувал албанска патна исправа и регуларна италијанска виза.

Полицијата го уапсила Дервишај, кој освен основните лични податоци и правец каде патува одбивал да дава одговори без присуство на адвокат. Одредена му е мерка притвор а истрагата треба да потврди дали имал намера да изврши терористички акт.