Директорите на Агенцијата за цивилно воздухопловство, Драги Стојаноски, и на Управата за финансиска полиција, Слободан Ивановски, потпишаа Меморандум за соработка кој отвора ново поглавје во меѓуинституционалната координација. Со овој документ, двете институции со здружени сили влегуваат во координирана мисија за подобра размена на податоци и информации, преку модерна, безбедна и ефикасна електронска комуникација.

Целта на меморандумот е во насока на зголемена ефикасност и ефективност во справувањето со обврските и надлежностите, преку прецизно утврдени форми и начини на соработка. Размената на информации ќе се врши по електронски пат, при што Агенцијата за цивилно воздухопловство ќе ѝ доставува на Управата за финансиска полиција податоци од Регистарот на впишани воздухоплови на Република Северна Македонија – како што се, датум на регистрација, тип и модел на леталото, сериски број, сопственик или корисник со целосни податоци, и други релевантни информации.

Секоја измена во регистарот автоматски ќе биде проследена до Управата, со што се гарантира континуирана ажурност и транспарентност.

Податоците ќе се користат исклучително во рамки на законските надлежности на Управата за финансиска полиција, која е должна да обезбеди нивна целосна заштита од неовластен пристап или злоупотреба.

Со потпишувањето на овој Меморандум, се поставува темел за посовремен, поефикасен и посигурен институционален пристап кон управувањето со информации од стратешко значење. Документот стапува на сила веднаш со неговото потпишување – симболично означувајќи ново ниво на одговорност и меѓусебна доверба на ниво на двете институции.