Во организација на Агенцијата за цивилно воздухопловство, од 6 до 8 октомври 2025 година, во Скопје се одржа TAIEX експертска мисија, со цел имплементација на воздухопловните барања во областа на воздухопловната медицина. Настанот беше поддржан и спонзориран од Европската унија преку Делегацијата на ЕУ во Република Северна Македонија.

Тридневната мисија ја реализираше г-ѓа Матилда Франковиќ–Рендулиќ, воздухопловен експерт и инспектор за воздухопловна медицина при хравстката Агенција за цивилно воздухопловство. На настанот учествуваа претставници од Агенцијата за цивилно воздухопловство, Министерството за транспорт, овластени испитувачи за воздухопловна медицина, како и специјалисти од ЈЗУ Градска општа болница „8 Септември“ – Скопје, ПЗУ „Неуромедика“ и ПЗУ „Ремедика“.

Во рамки на работните сесии беа разгледани применливите регулативи и стандарди на Република Северна Македонија и Европската унија, медицинските аспекти, грижата за здравјето и безбедноста на воздухопловниот персонал, како и практични примери и искуства од оваа област.

Примарната цел беше да се процени степенот на спроведување на воздухопловните барања во областа на воздухопловната медицина и да се обезбеди детално запознавање на персоналот со обврските кои произлегуваат од регулативите на ЕУ (Regulation No. 1178/2011 и Regulation No. 2015/340).

Овие европски стандарди и прописи ги регулираат аеромедицинските барања за пилотите, контролорите на летање и останатиот воздухопловен персонал, вклучувајќи го и процесот на издавање на аеромедицински сертификати, оценувањето на медицинската способност на кабинскиот екипаж, како и улогата и одговорностите на медицинските центри (AeMCs), аеромедицинските испитувачи (AME), општите лекари (GMPs) и лекарите за медицина на трудот (OHMPs).

Експертската мисија овозможи целосен преглед на клучните задачи и процеси утврдени во европските регулативи, со фокус на унапредување на знаењата за регулаторните барања и хармонизација на процесите за сертификација во областа на воздухопловната медицина. Посебен акцент беше ставен на подобрување на компетенциите и практичните вештини на учесниците, размена на искуства и усвојување на најдобрите европски практики за ефективна имплементација на медицинските прегледи и процедури поврзани со издавање и обновување на уверенија за медицинска способност.

За време на експертската мисија беа користени различни методи и алатки за обука – теоретски и практични примери, дискусии, анализа на документација и студии на случај, со цел унапредување на професионалните стандарди и подобрување на безбедноста во воздухопловниот сектор.